Երեւանում է Մարդու իրավունքների միջազգային ֆեդերացիայի (FIDH) պատվիրակությունը՝ նախագահ Սուեր Բելասենի գլխավորությամբ:
Ավելի քան 300 երկրներից ժամանող պատվիրակներ, ինչպես նաեւ եվրոպական կառույցների բարձրաստիճան պաշտոնյաներ ապրիլի 6-8-ը Հայաստանում կմասնակցեն մարդու իրավունքներին նվիրված "Արդարադատություն, Նոր մարտահրավերներ" թեմայով միջազգային համաժողովը:
Հանձնաժողովը կազմակերպում է Մարդու իրավունքների միջազգային ֆեդերացիան:
ֆեդերացիայի նախագահ Սուեր Բելասենը հայտարարել է, թե արդարադատության իրականացումը Հայաստանում շարունակում է մնալ որպես հիմնական խնդիր. "Եվ Հայաստանում, եւ մյուս երկրներում թիվ մեկ պրոբլեմը, որի դեմ մենք պայքարում ենք, անպատժելիությունն է: Բացի այդ, մեզ համար կարեւոր խնդիր է, թե ինչպես կարող է սովորական քաղաքացին արդար վերաբերմունքի արժանանալ դատարանի կողմից: Եվ վերջապես՝ արդար դատարանը մեր վերջնական նպատակն է, ինչը ներառում է ամեն բաղադրիչ՝ փաստաբանական ծառայություն, վճիռ, կողմերի հավասարության ապահովում եւ այլն:
Մարտի 1-ից հետո իրավիճակը Հայաստանում՝ կապված հանրահավաքների ազատ անցկացման խոչընդոտների ու մարդկանց ազատազրկման դեպքերի հետ, իհարկե, անհանգստացնող է։ Պետք է ձգտել վերականգնել ազատ արտահայտմանն ուղղված այն իրավիճակը, որ եղել է մինչեւ մարտի 1-ը եւ վիճակն անհամեմատ կբարելավվի այդ առումով։
Մենք դարձյալ պիտի անդրադառնանք մարտի 1-ի դեպքերին։
Այս դեպքում նույնպես գործ ունենք արդարադատության չիրագործման հետ։ Զոհվել է տասը մարդ, սակայն բոլորին է հայտնի, որ նրանց սպանության գործով ոչ ոք ձերբակալված չէ: Մենք կխոսենք նաեւ մարտի 1-ի դեպքերի հետեւանքով ազատազրկված այն տասը մարդկանց ճակատագրերի մասին, ովքեր չեն կատարել ծանր հանցագործություններ. սակայն այս պահին ազատազրկված են. նրանցից մեկը Նիկոլ Փաշինյանն է, ով դատապարտվել է 7 տարվա ազատազրկման":
Մոտ երկու ամիս հետո կմեկնարկի միջազգային համաժողովը, եւ Հայաստանի իշխանությունների շահերից է բխում կատարել ցանկացած դրական փոփոխություն արդարադատության համակարգում: Համաժողովին նախապատրաստվելով՝ մենք, բնականաբար, հետեւում ենք արդարադատության վիճակին Հայաստանում՝ քննարկում դրա վրա ներազդելու տարբեր մեխանիզմներ",-ասել է նա:
Համաժողովին մասնակցելու հրավեր է ուղարկվել նաեւ Սերժ Սարգսյանին:
