ԱԺ ՀՅԴ ներկայացուցիչ Արծվիկ Մինասյանը երեկ լրագրողների հետ հանդիպման ժամանակ իր տեսակետն արտահայտեց կառավարության՝ ԱԺ-ին ներկայացրած օրենսդիր փաթեթի վերաբերյալ, համաձայն որի առաջարկվում է ավելացնել տեղական հարկերի 10 հարկատեսակ:
ՀՅԴ-ի առարկությունները օրենսդիր փաթեթի վերաբերյալ ձեւակերպվեցին այսպես. "Ի՞նչ սկզբունքներով են որոշված այս հարկատեսակները, ինչքա՞ն բեռ է բերելու ազգաբնակչության և սոցիալապես խոցելի անձանց վրա, որքանո՞վ է այս առաջարկը համապատասխանում կառավարության կողմից հայտարարված տարածքային համաչափ զարգացման սկզբունքին և ինչպիսի՞ ռեսուրսներ կան, որոնք հաշվառված են և այդ հաշվառման ներքո այս հարկերը որքանո՞վ կարող են նպաստել այդ համայնքների զարգացման խնդրի լուծմանը: Արդյո՞ք ներկայացված մակարդակով այն քաղաքական էական ենթատեքստ չունի":
Առարկությունները ունեն 4 հիմնական ուղղություններ` տնտեսական հիմնավորումն է, սոցիալական դրդապատճառը կամ հետևանքները, տարածքային համաչափ զարգացման համատեքստում ազգաբնակչության տիրապետող ռեսուրսների ճիշտ օգտագործումը և քաղաքական ուղղվածությունը:
Արծվիկ Մինասյանի խոր համոզմամբ, այն տեսքով, ինչպիսին նախագիծը այժմ է, չի կարող քաղաքական ենթատեքստ չունենալ: "Այն, ինչը մակերեսային ձևով ներկայացվում է, դրա հիմքում արդարացված են հետևյալ հիմնավորումները, որ այս հարկային քաղաքականությունը մի կողմից բերելու է սեփականության նոր վերաբաշխման հնարավորության ընձեռմանը, մյուս կողմից ուժեղացնում է համայնքի անբարեխիղճ ղեկավարների դիրքերը և թուլացնում է բարեխիղճներինը: Քանի որ այն լծակը, որը տրվում է համայնքի ղեկավարներին՝ սա է հուշում. մասնավորապես, հարկ վճարողի կողմից հարկը ժամանակին չվճարելու դեպքում սեփականության իրավունքից զրկելու հայցով դիմել դատարան": Սա, ըստ Արծվիկ Մինասյանի` էական վտանգ է ներակայացնում հատկապես այն համայնքներում, որտեղ քաղաքացիները կամ ազգաբնակչությունը չունեն եկամտի մեծ հոսքեր:
ՀՅԴ ներկայացուցիչը նաև հավելեց, որ կառավարությունը այս նախագծով հերթական անգամ իր չմշակված և խոր վելուծությունների չենթարկված քայլն է կատարում, առանց հաշվի առնելու թե տնտեսական, թե սոցիալական, և թե քաղաքական հետևանքները:
Հարկատեսակներից առանձնացնելով "Հանրային տարածքների զբաղեցման հարկը", նշեց, որ այն կարող է կիրառվել ժողովներ, հանրահավաքներ իրականացնելու ժամանակ: Մինասյանի համոզմամբ, Երևանում կսահմանվի այնքան բարձր հարկ, որը կհանգեցնի քաղաքացիներին իրենց սահմանադրական իրավունքը չկատարելուն կամ նոր կոնֆլիկտների առաջացմանը:
Օրենսդիր փաթեթին այս տեսքով դեմ են արտահայտվել նաև ԲՀԿ-ն, ՕԵԿ-ը, "Ժառանգությունը":
