"Էլ ի՞նչ եզդի առանց ոչխար",- իրենք իրենց մասին ասում են եզդիները: Երեկ Եզդիների ազգային միության անդամ Օմար Մամոյանը "Հայելի" ակումբում ահազանգեց, որ Հայաստանում ոչխարների բիզնեսը վերցնում են եզդիներից:
Նրա ընդդիմախոս՝ Գյուղնախարարության անասնաբուծության ¨ տոհմային գործի վարչության պետ Աշոտ Հովհաննիսյանը երեկ զուր փորձում էր հանգստացնել Օմար Մամոյանին՝ ասելով. "Հանրապետությունում ոչխարի քանակը բավարար է, ¨ մոտակա 2-3 տարվա ընթացքում մենք կունենանք կտրուկ աճ: Մեր տվյալների համաձայն` անցյալ տարի հանրապետությունում կար շուրջ 560 հազար գլուխ ոչխար, որից 430 հազարը մայրական գլխաքանակն էր: Այսինքն` նման շարժի դեպքում ենթադրվում է`տարեկան 450 հազար մորթման ենթակա գլխաքանակ":
Ոչխարի բիզնեսի գիտակ Օմար Մամոյանը, առանց երկարացնելու, ուղիղ ասաց, որ չի հավատում Աշոտ Հովհաննիսյանին՝ավելացնելով. "Ժամից ես եմ գալիս, տեր ողորմեան ինքն է կարդում":
Միաժամանակ Մամոյանը երեկ չհերքեց այն փաստը, որ եզդիներն իրենց ոչխարները վաճառել են առաջարկված բարձր գնի համար, իսկ ՀՀ կառավարությունը ոչինչ չի անում, գոնե մայրական ոչխարների արտահանման լիցենզիա չտրամադրելու համար:
"Եթե նախկինում 1 կգ գառի միսն արժեր 1500 դրամ, ապա այսօր 4000 դրամով է վաճառվում: Նախորդ տարիներին մատաղի մեկ գառի արժեքը 15-20 հազար դրամ էր, իսկ այսօր 65 հազար դրամ է: նախորդ տարի 145 հազար գլուխ ոչխար երկրից արտահանվել է միայն 3-4 ամսում, իսկ փոխարենը Վրաստանից Հայաստան է ներմուծվել 17 300 գլուխ: Հայաստանն այս գործում առաջատարներից է եղել, իրենք են մեզանից տարել, ինչո՞ւ պետք է նման իրավիճակ ստեղծվի",- Գյուղնախարարության ներկայացուցչին դիմեց Մամոյանը:
Պատասխանի փոխարեն՝Աշոտ Հովհաննիսյանն իր հերթին հարց տվեց Մամոյանին՝ինչո՞ւ են եզդիներն իրենց ապրանքը վաճառել արտահանողներին:
Եզդիների ներկայացուցչի պատասխանը տրամաբանական էր . "Եթե ձեզ բարձր գին առաջարկեն, չե՞ք վաճառի ձեր ապրանքը: Մենք դեմ ենք արտահանելուն, սակայն բարձր գին են առաջարկում: Այս հարցում թերացել են պատասխանատու մարմինները, որոնք չեն սահմանափակել արտահանումը, այսինքն՝դուք":
