Հայ-թուրքական հարաբերություններում Սերժ Սարգսյանի ֆուտբոլային դիվանագիտությունը նախկին ՀՅԴ-ական, "Ակունք" քաղաքական, վերլուծական կենտրոնի նախագահ Ռուբեն Հակոբյանը համարում է ձախողված:
"Այդ գործընթացը ընթանում էր ֆուտբոլային խաղի կանոններով, որտեղ մեծ դեր ունի խաբսը: Հենց ի սկզբանե կողմերը միմյանց հետ ազնիվ չէին եւ աշխատում էին, որքան հնարավոր է շատ խաբս տալ",-երեկ "Հայելի" ակումբում հայտարարեց Ռուբեն Հակոբյանը:
Այս պահին դրությամբ նա հաղթող է համարում Թուրքիային. "Թուրքիային հաջողվեց լուրջ գործոն դառնալ տարածաշրջանում` Հայաստանի հրավերով: ՀՀ իշխանություններին մեկ տարի ժամանակ էր անհրաժեշտ, որպեսզի բարձրաձայն ընդունի, որ Թուրքիան մեր հետ խոսում է նախապայմանների լեզվով: Միամիտ պետք է լինել կարծելու համար, որ Թուրքիան Հայաստանի հետ հարաբերություններ կձեւավորի՝ հաշվի չառնելով Ադրբեջանի գործոնը, ԼՂ հիմնախնդիրը":
Հակոբյանը կարծում է, որ Հայաստանն այսօր շատ ավելի կարեւոր խնդիր ունի. "Կոռուպցիան մեր պետության հերն անիծել է: Կոռուպցիան այսօր փթթում է մեր երկրում: Հայաստանը դատարկվում ու ծերանում Է":
Երեկ Հակոբյանի ընդդիմախոսն էր ՀՀԿ պատգամավոր Գագիկ Մելիքյանը: Նա չհերքեց, որ Հայաստանում կոռուպցիայի մակարդակը մտահոգիչ է, սակայն համաձայն չէր որ վիճակը անուղղելի է: Ինչ վերաբերում է հայ-թուրքական հարաբերություններին, ապա Մելիքյանը համոզված է, որ անկախ նրանից, թե ինչ են հայտարարում այսօր թուրք պաշտոնյանները ու որքան կձգձգվի արձանագրությունների վավերացումը Թուրքիայում, միեւնույն է այն ընդունվելու է:
ՀՀԿ ներկայացուցիչը գտնում է, որ պետք է տարանջատել արձանագրությունները եւ թուրք պաշտոնյանների հայտարարությունները. "Արձանագրություններում նախապայմաններ չկան, սակայն Թուրքաին միշտ էլ փորձել է մեզ հետ խոսել նախապայմանների լեզվով: Սա 8 տարվա գործընթացը":
Այսինքն, հայ-թուրքական հարաբերություններում դուք շարունակո՞ւմ եք նախորդների քաղաքականությունը, որը 8 տարի առաջ է սկսվել. լրագրողներից մեկի այս հարցին՝ Մելիքյանը պատասխանեց. "Ոչ, նոր ենք սկսել: Մենք երկու թշնամաբար իրար տրամադրված պետություններ ենք, եւ ժողովուրդներին պատրաստել է պետք":
